top of page
  • صورة الكاتبDr Sami Al Zadjali

القروض البنكية.. ما لك.. وما عليك..







أي إنسان ناوي يقترض من البنك

ضروري يسأل 3 ثلاثة أسئلة قبل لا يوقع العقد:


السؤال الأول:

لو تاخذ كذا ألف ريال من البنك،

يا تُرى كم رح ترجّعهم؟!


بالغالب رح تتفاجأ بالفوائد!

لأنك لو ماخذ 20 الف ريال (مثلاً)

تلاقي نفسك مضطر ترجّعهم 28 أو 30 الف!

وإذا مقترض 50 الف

رح ترجّعهم 70 أو 75 ألف!


انت متخيل معي المبلغ يلي انت ملزم ترجّعه؟!


هم بالعقد يكتبوا لك

مثلاً

تدفع 250 ريال لمدة 180 شهر!

او تدفع 500 ريال لمدة 180 شهر!

لكن..

لما يذكرلك الرقم الكلي،

الوقع يكون كبير على نفسك!

وبلحظتها ممكن تتردد وما تاخذ القرض

أو يمكن تقرّر تنقّص منه دام ما محتاج هالقد!


نيجي لثاني سؤال..

إش الفرق بين تأجيل الأقساط في العيدين

وبين عدم التأجيل طوال السنة؟!!

اقصد هنا.. تخليهم يخصموا حتى في الاعياد!

بالله اش الفرق؟!


الفرق كبير ياخوي!

مع التأجيل، مش فقط المدة رح تتمدد

لكن.. الفائدة كمان رح تتمدد وتتضخّم!


يعني.. لو ماخذ 50 الف من البنك

ممكن ترجّعهم 70 ألف بدون تأجيل!

لكن مع التأجيل:

إحتمال ترجّعهم 80 أو 85 ألف!

ترا مع التأجيل.. (عدّاد الفوائد ما يوقف)!


لذلك.. هم سببين وراء:

قرضك ما جالس ينقص

رغم انك تدفع اقساطك منذ سنوات:

السبب الاول: نسبة الفائد لما تكون عالية

والسبب الثاني: التأجيل!!


السؤال الثالث يلي لازم تسأله للبنك:

لما القسط الشهري يكون 500 ريال (مثلاً)،

كم من هالمبلغ يروح للقرض

وكم المبلغ يلي تاخذوه كفوائد!


هنا رح تنصدم لما تعرف بأن

ما يقارب نصف القسط (أو 60%) يروح

للفوائد في السنوات الاولى من اي قرض!

يعني..

في اول 10 سنوات من مدة القرض

لو كنت تدفع قسط شهري = 500 ريال 👇🏼

300 ريال يروحوا للفوائد

وفقط 200 ريال يندفعوا للقرض!


عرفت ليش الناس تضارب لخفض نسب الفوائد!

وعرفت ليش قرضك مثلما هو منذ سنوات!

وتستغرب: ليش محّد شرحلك كل هالأمور!


السؤال يلي يخطر في بالك:

طيب ليش بالسنوات الاولى ياخذ الحصة الأكبر من القسط للفوائد؟!!!

يعني ليش ما يدفعوا للقرض أكثر و

يتركوا الفوائد للاخير؟!

الجواب معروف ياخوي!!!

يريدوا يضمنوا الفوائد أولاً!!


لو لا سمح الله صارلك شي..

التأمين او اهلك مضطرين يلتزموا بالدفع!

هنا لو اكتشفوا بأن الباقي من القرض

فوائد، يمكن الكل يطالب بإلغاء الفوائد والإلتزام بما تبقّى من مبلغ القرض لا أكثر!


لذلك البنوك قالت:

لااااااا.. هالحركات ما علينا!

إحنا نضمن فوائدنا في السنوات الأولى

ثم.. حتى لو جاء أي حد وطالب بإسقاط الفوائد

يكتشف بأننا اخذنا فوائدنا خلاص

والمتبقي مش فوائد بل - مبلغ البرض الاساسي!

فيصير بو يصير.. فلوس القرض لازم ترجع!


انا مرة قلت لمدير فرع

في أحد البنوك المعروفة:

انتو لو شرحتوا للشعب كل هالتفاصيل،

يمكن نص يلي متقدمين للقروض يغيّروا رايهم و

يرجعوا لبيوتهم بدون ما يقترضوا منكم!

قال لي: ادري!


في الطب ياخوي،

الجرّاح ممنوع يخليك توقّع على

أي ورق قبل العملية - غير بعدما

يشرحلك كل شي بالتفصيل!

لكن في البنوك.. هذا ما يحصل!

بل

يتحججوا بأنك انت يلي طلبت التأجيل

ويتحججوا بأنك انت يلي ما سألت عن هالتفاصيل

وكمان يتحججوا بأنك ما قريت العقد! ووقعت!

فالقانون لا يحمي المغفلين!


قرار الإقتراض من البنوك هو

قرار شخصي جداً!

ظروفك هي يلي تسحبك صوب البنوك!

ومتطلبات الحياة والزواج والسيارة والمسكن

تخليك توقّع عالقرض وعيونك مسكّرة!


أنا فتحت هالموضوع اليوم

لأن في شباب وبنات رح يتوظفوا قريباً

فأريدهم يعرفوا أهم حقيقة:

راتب الإنسان يكفيه - إذا ما عليه قرض بنكي!

و

اموال القروض.. حقيقي مافيها بركة بشهادة

كل إنسان أعرفه مقترض من البنوك!!

كلهم قالوا.. والله والله ما نعرفهم وين راحت و

كيف خلصت!


إذا كنت مضطر تقترض،

أريدك تراجع النقاط يلي ذكرتها في آخر الفيديو

لأنها نقاط مهمة جداً لك!


وربنا يوفق الجميع!

댓글


bottom of page