شوف يا معلم..
أنا دائماً أقول:
خلينا نحط أنفسنا مكان الشخص الآخر
ونفهم (هو ليش إتخذ بعض هالقرارات)!
فمثلاً
لو فلان عنده ماركة محلية - ومنتجاته رائعة
يا تُرى اش يخليه يحط أسعار مرتفعة؟!
أنا متوقع بأن الجواب رح يختلف
بإختلاف موقعك الحالي!
فإذا كنت زبون
بالغالب رح تشوف من زاويتك
وتتهم صاحب الماركة بالطمع أو التربّح
و
إذا كنت تاجر مثله وعندك مشروع تجاري
بالغالب رح تتفهم أو تستخدم لغة أقل حدة
(لأنك تعرف أشياء.. يمكن مايعرفها الزبون)!!
كثير هالعنوان صار يتكرر:
إذا تريدونا ندعم المشاريع المحلية،
عجب قولولهم ينزلوا من أسعارهم والخ!
وهنا.. رح أتكلم بمنطقية
وبدون ما أنحاز لأي جهة!
لكن
لازم أبدأ معك بمثال أو موقف
صار قدامي قبل سنوات - في 2014
كان في شخص يتهم كذا ماركة محلية بالغلاء!
ويعبي راس المتابعين تحت البوستات ويكتب:
لا تشتروا من هالماركات المحلية!
خلهم يخسروا ويسكروا ويتأدبوا والخ!
بعد سنوات
شفته حاط بالبيو بأنه صار صاحب ماركة جديدة!
ولما دخلت لصفحة الماركة - أقسم بالله..
شفته يضارب المتابعين تحت البوستات ويقول:
بو يقول عن ماركتي ومنتجاتي غالية وماعاجبنه،
لا يعمل فولو ولا يشتري من عندنا!
😅
يمكن تستغرب وتقول:
إش سبب هالتحوّل الكبير في المواقف!؟
أتوقع.. لما صار هذا الشخص تاجر
إكتشف التكاليف الكثيرة يلي عليه - علشان
يقدر يوفّر ويجهّز هالمنتج (او الخدمة) للزبون!
بمعنى..
لما هالشخص كان زبون،
كان فقط يشوف سعر المنتج الذي امامه!!!!!
فيتعتبر سعره غالي او مرتفع!!
👇🏼
ما كان يشوف تكلفة المصنع والشحن والتغليف
والامور الكثيرة يلي يمر بها المنتج لين ما يصير جاهز ومتوفر للبيع!
فالتاجر يحسب التكلفة الكاملة
(وأحياناً) يضيف عليهم فواتير الإيجار والكهرباء
ورواتب الموظفين - ثم (وفقط) يقدر يحط
سعر الفائدة يلي يربحها من البيع!
لذلك..
دائماً ينصحوا أصحاب المشاريع بأنهم
يقللّوا من تكلفة الإنتاج أو يدوروا على مصانع 👇🏼
تنتج لهم المنتجات بتكلفة أقل - علشان
يقدر يربحوا من بيع المنتجات بسعر معقول!
لكن.. هل معنى هالكلام:
كل الماركات المحلية منصِفَة في أسعارها؟
بقولك لا!! حتى أنا لاحظت بأن البعض يبالغ شوي
لكن..
مابيدك تعمل أي شي غير إنك ما تشتري من عنده!
عسى هذا التاجر الطمّاع يراجع نفسه ويغيّر أسعاره!
ويمكن يجي حد هنا ويقول:
طيب دكتور.. كيف اسعار بعض الماركات المحلية
اغلى من الماركات العالمية والاجنبية!! هل يُعقل!؟
هنا بقولك:
ياخوي.. لا تقارن بين المبتدىء والعالمي!
فقط الإنسان (قليل الخبرة) يعمل هالمقارنات!
وحتى أنا.. لما ذكرت لك قبل شوي:
أسعار هالشوكولاتة المحلية - قريبة من
أسعار باتشي والخ، ترا ما كنت اقارن!
بل..
كنت اعطيك فكرة عن الRange مال الأسعار!!
لان اغلبنا يعرف اسعار باتشي!
🤷🏻♂️
طيب ليش ما تجوز المقارنة بين
الماركات المحلية والعالمية؟
لعدة أسباب - أهمها:
كميات الإنتاج مختلفة تماماً!
فالماركة العالمية تعطي Order للمصنع بالالاف
أما الماركة المحلية - تطلب عدد بسيط! وهنا..
شي طبيعي التكلفة أعلى دام الطلب بسيط!
ثم..
الماركة العالمية عندها عدة فروع
وقاعدة جماهيرية كبيرة بحكم تاريخها وتسويقها!
(حتى لو ما قاموا بالترويج.. الناس تشتري)!
لكن بالنسبة للتاجر المبتديء:
ما يقدر يبيع إلا بالترويج والتسويق المكلف!
(وياريته قادر يبيع بأعداد كبيرة)!! يبيع على قده!!
وفي عوامل اخرى كثيرة تمنعك تقارن بين هال٢!
وكلامي كله.. لا هو بصف التاجر ولا بصف الزبون
بل.. كلام منطقي:
إذا تكلفة الانتاج مرتفعة.. وترفع بسببها اسعارك،
اتوقع بهالظروف.. التاجر هو الخسران الاول!
لاني ماعتقد الناس رح تشتري!
بل.. اغلب الناس صايرة تدوّر على البدائل!
ثم
لو انت كزبون.. شفت سعر منتج معين مرتفع شوي
لكنك ما لقيت نفس هالكواليتي عند احد
ومرتاح كثير مع هالماركة.. ف.. هنا تقول:
الغالي سعره فيه!
وهذا يلي حاصل مع بعض الماركات المحلية يلي
تقدّم منتجات او جودة ممتازة.. تختلف عن غيرها
(فتلاقي الناس تتذمر من السعر لكن.. تبقى تشتري)
لانهم حابين المنتج او مجبورين لان محد غير هالماركة توفره محلياً!
ومثلما انتو كنتوا تقولوا..
الخبر الحصري يلي بفلوس.. بكرا بيصير ببلاش!
د. سامي الزدجالي